បន្ទាយមានជ័យ៖ អភិបាលខេត្តបន្ទាយមានជ័យ ណែនាំដល់អាជ្ញាធរក្រុងស្រុក ពិសេសតំបន់ដែលប្រឈមនឹងទឹកជំនន់ ឱ្យត្រៀមរកទីទួលសុវត្ថិភាព ឧបករណ៍សង្គ្រោះបន្ទាន់ក្នុងករណីមានការជន់លិចក្នុងខេត្ត។

ថ្លែងក្នុងពេលចុះពិនិត្យមើលស្ថានភាពទឹកក្នុងភូមិសាស្ត្រក្រុងសិរីសោភ័ណ នៅព្រឹកថ្ងៃទី១០ កញ្ញា ឆ្នាំ២០២១នេះ អភិបាលនៃគណៈអភិបាលខេត្តបន្ទាយមានជ័យ លោក អ៊ុំ រាត្រី បានជំរុញទៅអាជ្ញាធរក្រុង-ស្រុក ដែលជាតំបន់ប្រឈមនឹងទឹកជំនន់ ឱ្យត្រៀមរកទីទួលសុវត្ថិភាពឲ្យបានរួចជាស្រេច ត្រៀមជួយសង្គ្រោះបងប្អូនពលរដ្ឋក្នុងករណីចាំបាច់ណាមួយ។

មួយវិញទៀតលោកក៏ឱ្យត្រៀមនូវឧបករណ៍ សំខាន់ៗចាំបាច់ ដូចជាសម្ភារៈសង្គ្រោះបន្ទាន់ ថ្នាំសង្កូវផ្សេងៗ ត្រៀមជួយសង្គ្រោះបងប្អូនពលរដ្ឋ ក្នុងរដូវទឹកជំនន់ដែលអាចនឹងមកដល់ក្នុងពេលខាងមុខនេះផងដែរ។

ក្រៅពីនោះលោកអភិបាលខេត្ត ក៏បានជំរុញបន្ថែមដល់អាជ្ញាធរនៅមូលដ្ឋានត្រូវចុះពិនិត្យតាមដាននូវស្ថានភាពទឹកឲ្យបានជាប់ជាប្រចាំ បើក្នុងករណីទឹកមានការកើនឡើងពិសេស តំបន់ដែលប្រឈមខ្លាំង ត្រូវជម្លៀសពលរដ្ឋទៅទីទួលសុវត្ថិភាពដែលបានរៀបចំទុក។

ក្នុងការចុះពិនិត្យមើលស្ថានភាពទឹកជាក់ស្តែងនៅថ្ងៃនេះ ស្ថានភាពទឹកស្ទឹងនៅក្នុងក្រុងមិនទាន់ឡើងដល់កម្រិតព្រួយបារម្ភបង្កជាទឹកជំនន់នោះទេ។

គួររំលឹកផងដែរថា កាលពីឆ្នាំ២០២០កន្លងទៅ ខេត្តបន្ទាយមានជ័យជាខេត្តមួយដែលរងគ្រោះខ្លាំងជាងគេ ដោយជំនន់ទឹកភ្លៀងធ្លាក់មកពីប្រទេសថែ ដែលធ្វើឲ្យប៉ះពាលភោគផលដំណាំកសិកម្មរបស់ពលរដ្ឋជាច្រើន ពិសេសក្រុងសិរីសោភ័ណ និងស្រុកមង្គលបូរីរងគ្រោះធ្ងន់ធ្ងរជាងគេក្នុងចំណោមក្រុង-ស្រុកទាំង៩ទូទាំងខេត្ត៕

^{PHOTO: ROEURNG CHANTREA}